بابری مسجد فیصلے کے پیش نظر ملک میں امن وامان کیلئے ’حافظ شجاعت ٹرسٹ‘نے اٹھایا یہ قدم

ہماری دنیا بیورو
آنند نگر مہراج گنج : ملک کے انتہائی حساس بابری مسجد و رام جنم بھومی تنازعہ کے فیصلے کے پیش نظر حافظ شجاعت فیض عام چیرٹیبل ٹرسٹ کے ایک وفد نےاجول کمار جی'ڈی ایم' مہراج گنج سے ملاقات کی۔ اس موقع پر چیف آف ٹرسٹی شمس الضحی خان نے کہا کہ ملک کے انتہائی حساس بابری مسجد و رام جنم بھومی تنازعہ پر طویل عدالتی کاروائی کے بعد اب نومبر کے وسط تک سپریم کورٹ کا فیصلہ آنے کی امید کی جارہی ہے۔ دونوں فریق سے جڑے اس انہتائی حساس تنازعہ کے فیصلے کے دوران علاقہ میں امن وامان اور باہمی ہم آہنگی و ہندو مسلم بھائی چارے کو برقرار رکھنا بہت ضروری ہے۔ انہوں نے مسلم طبقہ سے اپیل کرتے ہوئے کہا کہ سپریم کورٹ کا جو بھی فیصلہ آئے اسے سبھی کو خندہ پیشانی کے ساتھ قبول کرنا چاہئے، اور امن و امان کی فضاءکو برقرار رکھنے کے لئے ہر ممکن کوشش کرنا چاہئے، جس سے ملکی حالات اور ہندو مسلم بھائی چارہ قائم کیا جا سکے۔
ٹرسٹ کے جنرل سکریٹری حافظ شمس الہدی قاسمی نے کہا کہ تمام لوگوں کو سپریم کورٹ کے فیصلے کا احترام کرنا چاہئے اور اسے قبول کرنا چاہئے، انہوں نے مزید کہا کہ ملک میں امن و امان کو بگاڑنے کی کوئی کوشش نہیں ہونی چاہیے، اور شوشل میڈیا پر بھی احتیاط برتنی چاہئے، کسی بھی طرح کی بدامنی کی کوشش کو کامیاب نہیں ہونے دینا چاہئے، اشتعال انگیزی سے بچتے ہوئے تحمل، برداشت، حکمت عملی اور قیادت کے احکامات کے راہ پر چلنا چاہیے۔
وفد میں شامل قاری ساجد حلیمی نے نوجوانوں کو اشتعال انگیزی اور سوشل میڈیا، فیس بوک، واٹس ایپ کے ذریعے کسی بھی قسم کی شر انگریزی سے اجتناب کرنے اور غلط پوسٹ سے بچنے کی اپیل کی، واضح رہے کہ اس وقت حکومت کی سوشل میڈیا پر پینی نظر سے انکار نہیں کیا جا سکتا، اس لپیٹے میں اگر کوئی ملوث پایا جاتا ہے تو پرشاسن کی طرف سے ایسے مجرموں کے خلاف سخت قدم اٹھایا جائے گا۔